پورے خطے اچ معاشی ترقی تے خوشحالی کیتے محفوظ تے مستحکم افغانستان دی ضرورت اے ،وزیر خارجہ مخدوم شاہ محمود قریشی دا ’ہارٹ آف ایشیا‘ کانفرنس نال خطاب

استنبول ۔ 10 دسمبر (اے پی پی) وزیر خارجہ شاہ محمود قریشی آکھیے جو پورے خطے اچ معاشی ترقی تے خوشحالی کیتے محفوظ تے مستحکم افغانستان دے مقصد دے حصول دی ضرورت اے ،کوئی بیا ملک اے دعویٰ نی کرسگدا جو اوندے افغانستان نال او تاریخی دے پکے تعلقات ہن جیویں جو پاکستان دے ہن تے نہ ہی دنیا اچ کہیں بئے ملک کوں افغانستان اچ امن ، استحکام تے خوشحالی دی اتنی خواہش ہوسی جیویں پاکستان کوں اے ۔ اے گال انہاں استنبول اچ ’ہارٹ آف ایشیائ‘دی اٹھویں وزارتی کانفرنس اچ خطاب اچ آکھی اے ۔ ’ہارٹ آف ایشیائ‘ استنبول پراسیس دے تحت اے کانفرنس ترکی دے شہر استنبول اچ تھئی ۔ وزیر خارجہ شاہ محمود قریشی ایں موقع تے خطاب اچ آکھیے پاکستان گزریل 40سال توں ودھ عرصے توں 30لکھ توں ودھ افغان مہاجرین دی میزبانی تے افغانستان دی تعمیر تے ایندی ترقی کیتے کلیدی کردار ادا کریندا پئے ۔ افغانستان دی نویں سروں تعمیر تے ایندی ترقی اچ معاونت کیتے پاکستان ہک ارب امریکی ڈالر دے مالی وسائل وی استعمال اچ گھن آئے ۔ انہاں افغانستان پاکستان ایکشن پلان امن تے بھرپی (اے پی اے پی پی ایس) دی اہمیت ڈسیندے ہوئیں آکھیے جو ڈوہیں ملکاں دے ڈو پاسے دے تعلقات کوں مضبوط بنڑاونڑ اچ اے اہم ادارہ جاتی فریم ورک اے ۔ وزیرخارجہ افغانستان اچ امن و استحکام گھننڑ آونڑ کیتے مذاکرات بحالی دیاں کوششاں دا خیر مقدم کیتا تے اینکوں مثبت پیشرفت قرار ڈیندے ہوئیں پاکستان دی ایں خواہش دا اظہار کیتا جو امن عمل دا نتیجہ بین الافغان جامع مذاکرات دی صورت اچ برآمد تھیسی ۔انہاں خبردار کیتا جو ایندے تے ”شرپسنداں“ توں وی ہوشیار رہنڑ دی ضرورت اے کیوں جو انہاں دے اپنڑے مفادات ہن ۔ انہاں عالمی برادری تے زور ڈتا جو علاقائی تے عالمی اتفاق رائے دے ذریعے افغانستان اچ پائیدار امن دے قیام تے ایں موقع کوں ہتھوں نہ ونجنڑ ڈتا ونجے ۔ وزیرخارجہ ترک صدر رجب طیب اردوان نال وی کانفرنس دے موقع تے ملاقات کیتی ۔ ڈوہیں ملکاں وچال تاریخی خوشگوار تعلقات دا اعادہ کریندے ہوئیں وزیرخارجہ شاہ محمود قریشی حکومت اتے پاکستان دے عوام ولوں ترک حکومت اتے عوام کیتے پرجوش خیرسگالی دے جذبے دا ظہار کیتا ۔وزیر خارجہ شاہ محمود قریشی ترک وزیر خارجہ میولت کاواس اولو نال وی ملاقات کیتی ۔ ملاقات اچ ڈوہیں پاسوں سانجھے تعلقات کوں ودھاونڑ تے خاص طور تے معاشی تعلقات سمیت اگوں ودھنڑ دی خواہش ظاہر کیتی ۔کانفرنس دے موقع تے وزیر خارجہ مخدوم شاہ محمود قریشی دی جنوبی ووسطی ایشیاءکیتے قائم مقام نائب وزیر خارجہ ایلس جی ویلز نال وی مختصر ملاقات تھئی جیں اچ پاکستان، افغانستان ڈوپاسے تجارت متعلق امور تے گال مہاڑ کیتی گی ۔